Ntaub Npog Qhov Ncauj Qhov Ntswg: COVID-19

Kho tshiab 6/2/2023

SARS-CoV-2, tus kab vaislav (virus) uas ua rau mob COVID-19, sib kis los ntawm cov qaub ncaug txaws thiab ya thaum tib neeg ua pa, hais lus, hnoos, lossis txham. Vim txoj kev sib kis tus kab mob zoo li no, kev looj ntaub npog qhov ncauj qhov ntswg kom zoo thiaj li yuav pab tiv thaiv kev sib kis mob. Kev looj ntaub kuj tseem pab tiv thaiv tau lwm yam kab mob thiab, xws li mob khaub thuas daus no (influenza).

COVID-19 tsev kho mob cov qib txais neeg mob thiab cov tswv yim taw qhia rau tus kheej

Lub Koom Haum Tswj Xyuas thiab Tiv Thaiv Kab Mob (CDC) siv kev suav cov neeg uas tau mus pw tom tsev kho mob los ua kev ntsuas tias txhua txhua lub cheeb tsam nroog (county) hauv teb chaws Asmesliskas muaj feem sib kis mob nyob rau qib qis, qib nruab nrab lossis qib siab. Cov kev suav cov neeg mus pw tom tsev kho mob no raug txheeb xyuas tshiab txhua txhua lub lim tiam. Cov qib ntawm neeg mob no qhia txog tias kab mob COVID-19 muaj feem xyuam rau sawv daws txoj kev noj qab haus huv thiab cov kev kho mob ntau npaum li cas.

CDC pom zoo tias ib qib sib kis mob kom nyias muaj nyias ib txoj kev tiv thaiv. Yog xav paub tias koj lub cheeb tsam nroog (county) nyob rau qib twg thiab muaj cov kev ceev faj li cas, ces mus saib CDC: COVID-19 raws cov County. Nco ntsoov tias kev sib kis mob COVID-19 muaj nyob tau rau txhua txhua qib. Qib “qis” tsis tau txhais tias “tsis muaj feem sib kis tau”.

Ntau leej neeg uas muaj qee yam mob nkeeg yuav muaj feem siab dua rau kev mob hnyav los ntawm COVID-19. Yog xav paub tias kev muaj feem siab yuav mob hnyav ntawd muaj tau los ntawm yam dab tsi ces mus saib CDC: Cov Neeg Muaj Qee Yam Mob Nkeeg.

Ob peb yam uas yav tsum ras txog rau kev looj ntaub npog qhov ncauj qhov ntswg yog xws li tias seb CDC qib suav cov neeg mus pw tom tsev kho mob muaj npaum li cas nyob rau koj lub cheeb tsam, seb koj puas muaj feem siab yuav mob hnyav, seb puas muaj lwm tus neeg nyob ze koj yuav muaj feem mob tau yooj yim, thiab seb koj tus kheej tuaj yeem txaus siab li cas.

Yuav looj ntaub npog qhov ncauj qhov ntswg thaum twg

Qhov sob lus no piav txog CDC cov kev pom zoo looj ntaub npog qhov ncauj qhov ntswg raws CDC cov qib ntsuas tsev kho mob txais neeg mob nyob rau koj lub cheeb tsam county thiab kev muaj feem kis mob rau koj thiab lwm tus ib puag ncig koj. Nws hais koom nrog rau MDH cov lus pom zoo rau cov neeg uas lub cev tsis muaj zog tiv thaiv kab mob lossis cov muaj feem siab dua yuav mob hnyav thiab. Txawm MDH txhawb kom cov pej xeem hauv Minnesota ua raws cov kev ceev faj qib qis kawg nkaus, yog koj xav looj ntaub npog qhov ncauj qhov ntswg rau thaum twg los yeej tau yog tias ua rau koj nyob nyab xeeb dua, txawm kev kis mob thiab CDC cov qib txais neeg mob ntawm tsev kho mob yuav zoo li cas kuj xij. Looj hom ntaub npoj qhov ncauj qhov ntswg zoo tshaj plaws uas koj yuav tau, kom haum rau koj, thiab yog daim ntaub uas xis rau koj nquag looj, tshwj xeeb yog tias koj lub cev tsis muaj zog tiv thaiv kab mob lossis koj muaj feem siab yuav mob hnyav los ntawm COVID-19. Mus saib hom ntaub npog qhov ncauj qhov ntswg uas sau nyob hauv qab no kom paub ntau ntxiv.

Ua kom raws nraim cov lus noj qab haus huv qhia rau pej xeem txog kev looj ntaub npog qhov ncauj qhov ntswg, tsis hais tias CDC cov qib kis mob nyob rau koj cheem tsam county yuav zoo li cas kuj xij, yog tias:

• Koj muaj tsos mob lossis kuaj pom tias muaj mob lawm. Yog xav paub ntxiv tias yuav looj ntaub npog qhov ncauj qhov ntswg ntev npaum li cas thiab yuav nyob tsev (cais tus kheej) li cas, ces mus saib Yog Koj Tsis Xis Neej Lossis Kuaj Pom Tias Muaj Mob Lawm: COVID-19.
• Koj tau mus nyob ze lossis chwv raug lwm tus tib neeg mob COVID-19. Yog xav paub ntxiv tias yuav looj ntaub npog qhov ncauj qhov ntswg ntev npaum li cas thiab cov kev ceev faj, ces mus saib Nyob Ze lossis Chwv Raug COVID-19.

Kev taug kev deb coj tau koj mus ntsib lwm cov neeg tuaj lwm qhov chaw tuaj uas muaj kev sib kis mob COVID-19 thiab lwm yam mob nkeeg ntawm kev ua pa, nyob rau qib sib txawv. Tej zaum koj yuav mus rau tej qho chaw uas muaj neeg coob coob thiab tej qho chaw uas dim pa tsis zoo. CDC pom zoo kom koj looj ntaub npog qhov ncauj qhov ntswg thaum koj mus kev deb rau tej chaw uas muaj neeg coob coob lossis tsis muaj kev dim pa zoo, koom nrog rau hauv tej tsheb thauj pej xeem thiab tej chaw tos tsheb rau pej xeem. Cov chaw no yog xws li cov tshav dav hlau, cov tsev tos tsheb ciav hlau, thiab cov tsev tos tsheb npav. Mus saib CDC: Looj Ntaub Npog Qhov Ncauj Qhov Ntswg Thaum Taug Kev Deb kom paub ntxiv txog tias sijhawm taug kev deb li cas tseem ceeb dua plaws rau yus looj ntaub npog qhov ncauj qhov ntswg, koom nrog rau thaum ib tug neeg lub cev tsis muaj zog tiv thaiv kab mob lossis yog muaj feem siab rau kev yuav mob tau hnyav.

CDC cheeb tsam county qib kis mob COVID-19 siab

Yog koj nyob rau cheeb tsam county uas muaj CDC qib kis mob COVID-19 suav cov neeg mus pw tom tsev kho mob siab, ces looj ntaub npog qhov ncauj qhov ntswg thaum koj nyob tej chaw muaj neeg coob, suav nrog rau cov tsev kawm ntawv qib K-12 thiab lwm cov chaw hauv zej zog, tsis hais tias koj twb tau txhaj tshuaj tiv thaiv lawm los tsis tau, lossis koj yuav muaj feem kis mob hnyav li cas, lossis koj twb tau kis mob COVID-19 los dua lawm kuj xij.

Ntxiv rau no, yog koj lub cev tsis muaj zog tiv thaiv kab mob lossis koj muaj feem siab yuav mob tau hnyav los ntawm COVID-19, tej zaum tsim nyog rau koj caiv tsis txhob mus koom tej yam uas muaj nyob rau hauv tej chav tsev uas neeg coob coob sib sau vim tias ib tsam koj kis tau kab mob COVID-19. Koj kuj nug tau rau koj tus kws kho mob thiab, hais txog tswv yim kev ceev faj lwm yam ntawm COVID-19.

CDC cheeb tsam county qib kis mob COVID-19 nruab nrab thiab qis

Thaum CDC qib kis mob COVID-19 suav cov neeg mus pw tom tsev kho mob nyob qib nruab nrab lossis qib qis, kev yuav txiav txim looj ntaub npog qhov ncauj qhov ntswg yog nyob ntawm ob peb yam nram ntej no:

• Feem uas koj yuav mob tau hnyav thiab tej kev mob uas koj muaj. Yog koj lub cev tsis muaj zog tiv thaiv kab mob lossis koj muaj feem siab yuav mob tau hnyav heev los ntawm COVID-19, ces thaum CDC qib kis mob nyob rau nruab nrab, koj tsim nyog looj ntaub npog qhov ncauj qhov ntswg thaum nyob hauv tej chav tsev uas muaj neeg coob coob thiab tej zaum thaum nyob nraum zoov rau tej chaw muaj neeg coob thiab. Koj kuj nug tau rau koj tus kws kho mob seb thaum twg koj tsim nyog looj ntaub npog qhov ncauj qhov ntswg thiab seb puas muaj lwm yam tswv yim rau txoj kev ceev faj COVID-19.
• Feem yuav mob tau hnyav ntawm cov neeg ib puag ncig koj. Yog koj nyob nrog lossis muaj kev nyob ze lwm tus neeg uas lub cev tsis muaj zog tiv thaiv kab mob lossis lawv muaj feem siab yuav mob tau hnyav ntawm los ntawm COVID-19, ces koj tsim nyog looj ntaub npog qhov ncauj qhov ntswg thaum koj nyob ze lawv, tab txawm CDC qib kis mob yuav zoo li ca kuj xij.
• Tej chaw uas cov neeg muaj feem siab yuav mob hnyav sib sau. Cov neeg mus rau tej chaw uas muaj cov neeg muaj feem siab yuav mob tau hnyav, tsim nyog looj ntaub npog qhov ncauj qhov ntswg, tsis hais tias CDC qib kis mob yuav nyob li cas kuj xij, tshwj xeeb yog cov chaw uas mua neeg coob coob sib koom. Tab txawm qib kis mob nyob qib nruab nrab mus rau qib qis xwb los, tsim nyog muaj cai tswj looj ntaub npog qhov ncauj qhov ntswg thiab kev tiv thaiv lwm yam xws li kho lub chav kom muaj kev dim pa nyob rau cov chaw uas muaj cov neeg muaj feem siab yuav mob hnyav, los mus txo kev sib kis kab mob COVID-19. Kawm kom paub ntxiv txog kev kho tej chav chaw kom dim pa, muaj cua tshuab thiab cua tuaj kom zoo nyob rau ntawm Lus Taw Qhia Rau Cov Pa Cua Nyob Hauv Tej Chav Tsev: COVID-19 thiab CDC: Kev Dim Pa Rau Cov Tsev.
• Muaj mob sib kis ua ib phaum lossis ua pab pawg. Cov thawj coj tswj ceev kev noj qab haus huv thiab cov chaw saib xyuas neeg mob nkeeg xws li cov tsev kho mob lossis cov tsev tu neeg mob, tej zaum yuav pom zoo kom koj thiab lwm tus neeg ib puag ncig koj looj ntaub npog qhov ncauj qhov ntswg thaum muaj kev kis mob COVID-19 ua ib phaum (ib pab pawg neeg).
• Kev tau txhaj tshuaj. Yog koj tsis tau txhaj tshuaj tiv thaiv, tshwj xeeb yog koj tsis tau mob COVID-19 dua li, ces tsim nyog koj looj ntaub npog qhov ncauj qhov ntswg thaum nyob hauv tej chav tsev ua muaj neeg pej xeem coob coob sib sau, tab txawm qib kis mob ntawm lub cheeb tsam nroog yuav zoo li cas kuj xij.
• Nyob ntawm koj tus kheej yeem. Koj xav looj ntaub npog qhov ncauj qhov ntswg rau thaum twg los yeej tau nyob ntawm koj tus kheej txaus siab yeem xwb, tab txawm lwm tus ib puag ncig koj tsis looj ntaub thiab CDC qib kis mob hauv koj lub cheeb tsam nroog yuav nyob rau qib nruab nrab mus rau qib kis xwb kuj xij.

Yog xav paub lwm yam tswv yim thiab kev tiv thaiv ntxiv ces mus saib Tiv Thaiv Koj Tus Kheej & Lwm Tus: COVID-19.

Lus cim cia: Tej chaw saib xyuas neeg mob nkeeg xws li cov tsev kho mob loj thiab me, thiab cov tsev tu neeg laus, lawv yuav muaj lawv ib co lus pom zoo thiab cov cai tswj rau kev looj ntaub npog qhov ncauj qhov ntswg. Ua kom raws cov lus pom zoo lossis cov cai tswj raws li ntawm lub chaw uas koj mus.

Tej zaum muaj cov cai tswj kom looj ntaub npog qhov ncauj qhov ntswg nyob rau qee qhov chaw

Qee qhov chaw yuav muaj cai tswj kom looj ntaub npog qhov ncauj qhov ntswg uas los ntawm tsoom fwv teb chaws, tsoom fwv lub xeev, thiab ntawm cov kiab khw lag luam hauv zej zog, tsis hais tias CDC qib kis mob yuav zoo li cas kuj xij. Piv txwv li:

• Cov chaw saib xyuas neeg mob nkeeg, suav nrog rau cov chaw tu neeg mob ntev, tej zaum yuav muaj cai tswj kom looj ntaub npog qhov ncauj qhov ntswg los ntawm tsoom fwv teb chaws, tsoom fwv lub xeev, thiab/lossis cai tswj ntawm lub zej zog.
• Cov thawj coj ntawm zej zog (xws li lub nroog loj, nroog me, lossis lub cheeb tsam county) tej zaum yuav muaj kev tsim tsa cai tswj thiab yuav tsum ua kom raws cov cai ntawd.
• Cov kiab khw lag luam tej zaum yuav muaj cai tswj kom looj ntaub npog qhov ncauj qhov ntswg, ces cov neeg ua hauj lwm thiab cov neeg tuaj mus hauv cov kiab khw yuav tsum tau ua raws cov cai ntawd.

Qhov no tsis tau yog tag nrho cov cai tswj kev looj ntaub npog qhov ncauj qhov ntswg. Saib kom koj paub meej txog cov cai tswj nyob rau hauv koj lub cheem tsam zej zog thiab lub chaw hauj lwm. Cov kiab khw lag luam thiab tib neeg uas paub tsis meej txog cov cai no, tsim nyog mus tham nrog cov kws lij choj kom paub tseeb.

Hom ntaub npog qhov ncauj qhov ntswg

• MDH pom zoo kom looj daim ntaub npog qhov ncauj qhov ntswg uas zoo thiab haum thiaj li pab tiv thaiv cov kab mob COVID-19 uas txia tshiab xws li Omicron. Cov ntaub npog uas zoo ces yog xws li hom N95 lossis hom KN95, uas tiv thaiv tej pa kua dej txaws tau zoo heev. Cov ntaub npog uas yog muab ntawv coj los ua (muaj ib lub npe tias siv tas pov tseg) kuj pom tau tias tiv thaiv tau zoo thiab.
• Yog koj tsis muaj cov ntaub npog zoo xws li hom N95 lossis KN95, ces looj ob txheej ntaub npog qhov ncauj qhov ntswg uas yog hom ntaub ntom ntom los kuj tau thiab. Koj muab ib daim ntaub ntawv los mus looj rau hauv qab daim ntaub paj los kuj pab ntxiv kev tiv thaiv tau zoo thiab. Daim ntaub paj yuav tsum ntom ti nkaus rau lub ntug ntawm daim ntaub ntawv thiab khwb tau ceev haum nkaus rau koj lub ntsej muag.
• Kev looj ib daim ntaub npog qhov ncauj qhov ntswg uas zoo yim huab tseem ceeb yog tias koj lub cev tsis muaj zog tiv thaiv kab mob lossis yog koj muaj feem siab yuav mob tau hnyav ntawm COVID-19.
• Nrhiav cov ntaub looj uas muaj tus pas hlau nyob rau ntawm qhov ntug npog tus caj ntswm. Qhov no yuav pab kom daim ntaub looj tau haum thiab tsis txhob muaj kis khoob.
• Tsis txhob siv daim ntaub looj uas yog cov ntaub nyias nyias, tsis ntom, lossis yog ib txheej ntaub xwb, xws li qee hom ntaub npog ntseg muag, ntaub qhwv caj dab, lossis ntaub qhwv taub hau. Cov ntaub no tiv thaiv cov pa kua dej uas txaws tawm thaum tib neeg hais lus, hnoos, thiab txham tau tsis zoo. Yog koj looj ib daim ntaub qhwv caj dab kom sov, ces loo jib daim ntaub npog qhov ncauj qhov ntswg hauv qab thiab.
• Cov ntaub looj uas muaj kis dim pa es pab kom ua pa tau zoo; muaj cov qhov loj loj; lossis cov ntaub uas muaj qhov khoob, to qhov, thiab muaj tshooj kis khoob nyob rau daim ntaub, TSIS ZOO rau kev tiv thaiv vim tias nws qhib rau cov pa kua dej txaws tshab daim ntaub tau.
• Kev looj ntaub npog qhov ncauj qhov ntswg tej zaum yuav nyuaj rau qee leej neeg xws li cov uas muaj xwm txheej ntawm lub cev xws li cov lag ntseg lossis hnov lus tsis zoo, rau txoj kev yuav sib tham nrog lwm tus. Mus saib Kev Sib Txuas Lus Nrog Lwm Tus Thaum Looj Ntaub Npog Qhov Ncauj Qhov Ntswg, uas muaj ntaub ntawv ntawm Minnesota Chav Pab Cuam Cov Neeg Lag Ntseg thiab Cov Hnov Lus Tsis Zoo uas yog ib feem ntawm Lub Tuam Tsev Pab Cuam Tib Neeg, qhia txog kev siv cov cuab yeej uas pom tshab thiab lwm yam cuab yeej pab rau kev sib txuas lus.
• Yog xav paub ntxiv txog lus qhia pom zoo rau cov ntaub npog qhov ncaug qhov ntswg ces mus saib CDC: Hom Ntaub thiab Cov Cuab Yeej Npog Qhov Ncauj Qhov Ntswg.

Looj ntaub npog qhov ncauj qhov ntswg li cas

• Ntxuav koj ob txhais tes ua ntej koj looj thiab hle koj daim ntaub npog qhov ncauj qhov ntswg.
• Daim ntaub yuav tsum npog koj lub qhov ntswg thiab qhov ncauj tag nrho, thiab looj tau ntom nkaus koj lub ntsej muag, tsis txhob muaj kis khoob hlo li. Daim ntaub yuav tsum tsis txhob ceev dhau thiab yuav tsum looj tau xis rau koj.
• Rau cov menyuam muaj 2 xyoos rov saud, mus nrhiav daim ntaub looj uas yog ua rau menyuam yaus kom thiaj li looj tau haum. Cov menyuam hnub nyoog yau dua 2 xyoos tsis tas looj ntaub npog qhov ncauj qhov ntswg.
• Yog koj rau tsom iav ces nrhiav daim ntaub looj uas khwb tau ntom nkaus rau koj tus caj ntswm lossis daim ntaub uas muaj tus pas hlau ntawm tus ntug caj ntswm thiaj pab kom koj lub tsom iav tsis txhob pos huab.
• Tsis txhib kov chwv koj daim ntaub looj thaum koj tab tom looj. Yog tias koj yuav tsum tau nquag nquag kho thiab kov koj daim ntaub looj ces txhais tias daim ntaub tsis haum rau koj thiab tej zaum koj yuav tsum tau mus nrhiav daim ntaub tshiab lossis muab kho dua tshiab.
• Yog kov siv daim ntaub looj uas yog ntaub paj, ces nco ntsoov muab coj mus ntxuav tom qab koj looj tas txhua txhua zaus.
• Yog koj yuav rov siv daim ntaub looj uas yog hom N95 lossis KN95, ces muab khaws cia rau hauv ib lub hnab ntawv. Tsis txhob muab hom ntaub looj N95 lossis KN95 coj mus ntxuav tom qab siv tas. Mus saib cov lus sau qhia uas muaj nrog daim ntaub los, kom paub txog tias yuav tsum muab pov tseg es hloov siv lub tshiab rau thaum twg.
• Tsis txhob siv daim ntaub looj uas tsis huv, ntub dej, lossis piam puas lawm.

Xaiv cov kab lus (links) hauv qab no mus kawm kom paub ntxiv txog ntaub ntawv thiab lus qhia rau kev xaiv thiab kev looj ntaub npog qhov ncauj qhov ntswg:

• Kev Looj Daim Ntaub Npog Qhov Ncauj Qhov Ntswg Kom Zoo (PDF)
  Daim ntawv rub (download) coj los luam tawm tau.
• Yeeb Yaj Duab Video Tswv Yim Rau Xwm Txheej COVID-19
  Yuav Looj Daim Ntaub Npog Qhov Ncauj Qhov Ntswg li cas thiaj zoo thiab Tej Yam Tsim Nyog thiab Tsis Tsim Nyog Ua Ntawm Kev Looj Ntaub Tiv Thaiv COVID-19. Muaj cov ntawv teev sau thiab cov ntawv sau ua lwm yam lus.
• CDC: Cov Ntaub Npog Qhov Ncauj Qhov Ntswg
• Lub Chaw Pab Kev Hnov Lus, Hais Lus & Lag Ntseg: Yuav Tsim Ua Daim Ntaub Npog Qhov Ncauj Qhov Ntswg Kom Siv Tau Rau Cov Lag Ntseg Li Cas
• Tswv Yim Lus Qhia Rau Daim Cuab Yeej Thaiv Lub Ntsej Muag (PDF)

Cov kev pab cuam uas tsim nyog

Tej zaum yuav muaj kev cai lij choj tswj rau qee lub lag luam kiab khw thiab tej koom haum kom muaj kev pab cuam uas tsim nyog rau qee leeg neeg, xws li cov tib neeg uas looj ntaub npog qhov ncauj qhov ntswg tsis tau vim muaj kev xiam oos khab, kom muaj hauv kev koom lossis txais txiaj ntsig tau los ntawm cov kiab khw tej lag luam.

Cov lag luam kiab khw thiab lwm yam chaw tsim nyog yuav tsum paub tias:

• Cov neeg uas muaj qee yam kev xiam oos khab, kev tsis puv rau ntawm lub paj hlwb, tus xeeb ceem, lossis lub cev, tej zaum yuav muaj kev cuam tshuam siv ntaub npog qhov ncauj qhov ntswg lossis siv cov cuab yeej npog ntsej muag nyuaj.
• Cov neeg uas muaj kev ua pa nyuaj, tsis muaj kev feeb meej, lossis tsis muaj cuab kav hle tau lawv daim ntaub npog qhov ncauj qhov ntswg nrog lawv tus kheej, tsis tsim nyog looj ntaub.
• Cov menyuam muaj hnub nyoog yau dua 2 xyoos tsis tsim nyog looj ntaub.
• Qee yam (xws li thaum ua luam dej lossis tej yam uas yuav tau ntub dej los yog yuav raus ntsej muag rau hauv dej) tej zaum yuav ua rau daim ntaub looj ua hauj lwm tiv thaiv tsis tau lawm.

Pej xeem Minnesota muaj txoj cai nyob kom tsis txhob raug kev ntxub ntxaug saib tsis taus ntawm lwm tus. Txoj cai Minnesota Human Rights Act txwv tsis pub muaj kev saib tsis taus cov neeg xiam oos khab nyob rau hauv tej chaw uas pej xeem sib koom, tej chaw ua hauj lwm, tej tsev kawm ntawv, thiab lwm cov chaw. Yog koj muaj kev xiam oos khab uas ua rau koj looj ntaub npog qhov ncauj qhov ntswg tsis tau thiab koj ntseeg tias koj tau raug ntxub ntxaug vim koj muaj kev xiam oos khab, ces ceeb toom tau rau Minnesota Lub Tuam Tsev Tswj Cai Sib Luag Rau Haiv Neeg: Ceeb Toom Kev Ntxub Ntxaug lossis hu xov tooj rau Discrimination Helpline ntawm 833-454-0148.